Trisquel GNU/Linux

Hoxe publicamos a versión 2.1 de Trisquel GNU/Linux, tanto da edición doméstica coma da educativa e a de empresas. Isto supón un fito en varios sentidos: publícase a primeira versión oficial de Trisquel Edu, as tres pasan a empregar o kernel linux-libre, e incorporan centos de pequenas melloras.

Todas estas novidades poden obterse mediante as actualizacións automáticas, sen necesidade de reinstalar o sistema.

Descargar

Énchenos de orgullo poder asegurar, tras unha larga tarefa de avaliación do contido dos nosos repositorios co respaldo e a supervisión de GNU, que Trisquel é libre ata onde alcanza a vista. Por este motivo aparecemos na lista de distribucións recomendadas por GNU/FSF.

Para comprometernos firmemente a manter estes ideais no futuro, enviamos hoxe unha carta aberta á comunidade, que recolle o forte convencemento de todo o equipo de Trisquel cara a distribución e recomendación de software libre de xeito exclusivo.

O equipo de desenvolvemento de Trisquel GNU/Linux convídavos á presentación oficial da nova edición para centros educativos do sistema operativo libre, nomeada "Trisquel Edu". O acto terá lugar na Aula Magna do Mosteiro de San Martín Pinario, en Santiago de Compostela, as 18:30 do día 16 de Decembro.

Escritorio do Trisquel edu

No especial "O Software Libre Galego" da revista Código Cero podedes atopar dous artigos sobre a nova edición educativa de Trisquel GNU/Linux, escritos por Diego Rosales, colaborador do proxecto, e Rubén Rodríguez, director do mesmo.

Descargar a edición en pdf do número 64.